2018 Хоёр Солонгосын дээд хэмжээний уулзалт" болох түүхэн өдөр.
2018.04.27 11:37
Өнөөдөр(18.04.27) "2018 Хоёр Солонгосын дээд хэмжээний уулзалт" болох түүхэн өдөр.
Уулзалт Өмнөд солонгосын цагаар 9 цаг 30минутанд эхлэх бөгөөд хилийн дээсэн дээгүүр алхах Ким Жон Уныг шугамны нөгөө талд Мүн Жэ Ин тосож мэндлэхээр төлөвлөгджээ.
Өмнөд Солонгосын ерөнхийлөгч Мүн Жэ Ин, Хойд Солонгосын удирдагч Ким Жон Ун нарын уулзалт нь хоёр Солонгосын эв нэгдлийг ерөөсөн олон сайхан билэгдэл санаа дүүрэн болох аж.
Солонгосын дайн дууссанаас хойш 65 жилийн дараа анх удаа Хойд Солонгосын удирдагч өмнөдийн газар шороонд хөл тавих гэж байгаа түүхэн үйл явдал нь солонгос түмнийг догдолуулаад зогсохгүй дэлхий дахины анхаарлыг татаж буй.
Өмнө нь 2000, 2007 онуудад болж байсан дээд хэмжээний уулзалтууд дандаа Хойд Солонгосын Пёньянд болсон байдаг.
Хил давсны дараа Ким Жон Ун хүндэт харуулын өмнүүр алхаж Панмунжомы өмнө хэсэгт байрлах Энхийн ордонд хүрэх аж. Ордны зочны дэвтэрт сэтгэгдлээ бичсэний дараа Ким Жон Ун удирдагч Өмнөд Солонгосын ерөнхийлөгч Мүн Жэ Ин ерөнхийлөгчтэй хамт дурсгалын зураг авахуулна.
Өглөөний энхийн уулзалт 10цаг 30минутанд эхлэх аж.
Хоёр тал өдрийн зоогоо тус тусдаа зооглоно.
Үдээс хойш хоёр удирдагч тоорын мод суулгах бөгөөд мод суулгах хөрсийг Хойд Солонгос-Хятадын хил дээр орших Пэктү уул болон Жэжү арлын Халла уулаас авчирсан байх ба энэ нь Солонгосыг нэгтгэх үзэл санааг илэрхийлж буй.
Үүний дараа удирдагчид “Панмунжоны Тунхаг” хэмээх хамтарсан мэдэгдэлд гарын үсэг зурж мэдэгдэлээ олон нийтэд зарлан тунхаглах бөгөөд хараахан газар нь тодорхой бус ажээ.
Үүгээр хэлэлцээр өндөрлөж хүндэтгэлийн оройн зоог хамтдаа барина. Зоогийн дараа Ким Жон Уныг дагалдагсдынхаа хамт үдэх ёслолын ажиллагаа болж хойд солонгосын зочид буцаж хил давахаар төлөвлөгджээ.
Ким Жон Уныг тус улсын Ардын Их Хурлын тэргүүлэгчдийн дарга Ким Ён Нам, удирдагчийн төрсөн дүү бүсгүй Ким Ёо Жон болон гадаад хэргийн болон батлан хамгаалахын сайд нар дагалдан ирэх аж.
Солонгосын хойгийн энхтайванлаг уулзалт сайхан болж өндөрлөхийг ерөөе.
Мэдээлэл хүргэсэн БНСУ~с Ж. Нармандах. 18.04.27