Солонгосын хойг Японы дарлалаас ангижирсны 70 жилийн ой энэ онд тохиож байгаа. Энэ нь Солонгосын хойгийн хоёр хуваагдсан нэг үндэстнийг эргэн нэгтгэхэд чухал нөлөө үзүүлэх түүхэн баярт үйл явдал юм. Үүнийг Хойд Солонгосын удирдагч Ким Чен Ун шинэ жилийн баярын мэндчилгээндээ онцолсон билээ. Түүнчлэн Ким Чен Ун Өмнөд Солонгосын Ерөнхийлөгч Пак Кын Хег хэлэлцээрийн ширээнд урьснаар хоёр орны харилцаанд том дэвшил гарч байна. Ким Чен Уны ер бусын найрсаг урилгын хариуд Өмнөд Солонгосын Ерөнхийлөгч Пак Кын Хе Пхеньянтай хэлэлцээрийн ширээний ард суухын өмнө ямар нэгэн болзол тавихгүй хэмээв. Пак Кын Хе Солонгосын хойгийн энх тайвны төлөө Пхеньян цөмийн хөтөлбөрөө зогсоох шаардлагатай боловч Ким Чен Унтай хийх уулзалтын өмнө урьдчилсан нөхцөл, болзол тавихгүй хэмээн мэдэгдсэн юм. Ийнхүү хоёр Солонгосын төрийн тэргүүний уулзалтыг товлох асуудал яригдаж эхлэв. Дэлхийн II дайны дараа хоёр хуваагдсан Хойд болон Өмнөд Солонгосын төрийн тэргүүнүүд өнгөрсөн хугацаанд ердөө хоёр удаа  уулзсан түүхтэй. Хоёр Солонгосын нэгдэл энэ онд илүү үр дүнтэй яригдах байдал ажиглагдаж буй.

Үүний зэрэгцээ Пхеньяний талаас Вашингтонд өөр нэг “эргэлзээтэй” санал тавиад байна. Энэ нь АНУ, Өмнөд Солонгостой хамтарсан уламжлалт цэргийн сургуулилтаа зогсоовол Пхеньян цөмийн хөтөлбөрөө зогсоох аж. Пхеньян Холливудын компанийг хакердсан хэрэгт сэжиглэгдсэнээр АНУ-ын зүгээс дахин хатуу хоригтой нүүр тулахад хүрсэн юм. Хойд Солонгосын эсрэг шинэ хориг нь Пхеньяний олон улсын санхүүгийн системтэй холбогдсон үлдсэн ганц сүлжээг хаахад чиглэгджээ. Тодруулбал, Хятадыг оролцуулаад олон улсын банк, санхүүгийн институтыг Хойд Солонгостой харилцахыг хориглох аж. Ийнхүү АНУ-ын шинэ хориг яригдаж эхэлмэгц Ким Чен Ун Вашингтонд хандан дээрх саналыг тавьсан нь эргэлзээ төрүүлж байна. Түүнчлэн АНУ, Өмнөд Солонгосын хамтарсан уламжлалт цэргийн сургуулилтыг тасалдуулсны дараа Пхеньян дахин цөмийн хөтөлбөрөө үргэлжлүүлэхгүй гэх баталгаа байхгүй. Гэвч Хойд Солонгосын АНУ-д тавьсан санал хий хоосон зүйл биш гэдгийг Сингапурын уулзалт гэрчлэх аж. Хойд Солонгосын цөмийн хөтөлбөрийн асуудлаарх зургаан талт хэлэлцээрт оролцогч Ри Юн Хогийн баг өнгөрсөн амралтын өдрөөр Сингапурт Америкийн экс албан тушаалтнууд, академич нартай уулзалт хийлээ. Тэд Хойд Солонгосын цөмийн пуужингийн асуудлыг хэлэлцсэн тухай олон улсын хэвлэлүүд мэдээлэв. 

Хойд Солонгос 2006 оноос хойш гурван удаа “амжилттай” цөмийн туршилт хийсэн билээ. Хойд Солонгос 2013 онд гурав дахь цөмийн туршилтаа Пхеньянаас 380 орчим км зайнд газар доор явуулсан юм. Энэ нь 4.5-5.2 магнитудын чичирхийлэл үүсгэснээс үндэслэн 6-7 килотонн цөмийн бөмбөг туршсан гэж үздэг. Өмнө нь 2009 онд Хойд Солонгос 2-5 килотонн цөмийн бөмбөг туршсан аж. Харин 2006 онд нэг килотонн цөмийн бөмбөг туршиж байв. Түүнчлэн Хойд Солонгос 2012 онд алсын зайн баллистик пуужин харваж, дэлхий нийтийг сандаргасан юм. Хойд Солонгос ард иргэдээ өлсгөлөнд нэрвэгдүүлэн байж, ингэтлээ цөмийн хөтөлбөрт хөрөнгө хаядаг нь улс төрийн дэглэмээ хадгалах арга гэж үзэх нь ч бий. Хойд Солонгост 1990 онд болсон аймшигт өлсгөлөнгөөс хойш эдийн засаг, ядуурал, хүнсний хомсдол үргэлжилсээр байгаа юм. Гэвч Хойд Солонгосын удирдагчид бүх мөнгөө цөмийн хөтөлбөр, цэрэг армидаа зарцуулж, олон улсыг айлгах тактик баримталсаар байна.