Улаанбаатар /МОНЦАМЭ/. "Пёнчан - 2018" өвлийн XXIII олимпийн наадамд оролцох цанын баг тамирчдын хувцас Монгол Улсын Төрийн далбааны өнгө орсон үзэмжтэй сайхан хувцас болсныг БТСГ-ын дарга Ц.Шаравжамц фэйсбүүк хуудсандаа тавьжээ.

Тэрбээр, “Зарим хүмүүс шигшээ багийн тамирчдын маань хувцсыг хараад уралдаан тэмцээндээ өмсөх юм байна гэж ойлгосон уу, нэлээн дайрлаа. Цанын шигшээ багийн олимпийн наадамд өмсөх хувцсыг манай цанын холбооны ерөнхийлөгч Д.Хишигжаргал, ерөнхий нарийн бичгийн дарга Э.Очирсүрэн нартай өнгөрсөн жил хамтраад БТСГ-ын санхүүжилтээр Финланд улсад хийлгэсэн юм. Уул нь олимпийн нээлт хүртэл нууцалж байгаад сюрприз барина гэж бодож байсан. Төрийн далбааныхаа өнгөөр ийм сайхан хувцас хийлгэсэн Монголын цанын холбооныхондоо,ерөнхийлөгч Д.Хишигжаргал ахдаа нийт спорт сонирхогчдынхоо нэрийн өмнөөс баярлалаа. Та нарынхаа нервийг барсан, бас тэвчээр алдаж сюрпризээ задалсан муу Шарваагаа өршөөн соёрхоорой. Тамирчид дасгалжуулагчид, цанын холбооныхондоо амжилт ерөөе” гэж бичжээ.