Өнгөрсөн долоо хоногийн турш БНСУ руу зорчих визэнд өөрчлөлт орсон эсэх талаар эргэлзээтэй олон мэдээллүүд гарч иргэдийг төөрөгдүүлэхэд хүрсэн. Тэгвэл БНСУ-ын Элчин сайдын яамнаас виз олгох журамдаа хоёрдугаар сарын 1-ний өдрөөс эхлэн зарим нэгэн процедурын шинжтэй өөрчлөлт оруулсан тухай баттай мэдээллийг бид уншигчдадаа хүргэж байна.  БНСУ руу зорчих виз олгох ерөнхий журам хэвээр боловч олон удаагийн болон оюутны визээр зорчигчдод дараах хөнгөлөлтийг үзүүлэхээр тогтсон байна. Үүнд,

1. БНСУ руу зорчих олон удаагийн визийг 6-7 шалгуур үзүүлэлтээр 1-3 жилийн хугацаатай олгодог. Шалгуур үзүүлэлт дотор  олон удаагийн виз мэдүүлэгч нь сүүлийн хоёр жилийн дотор OECD-ийн гишүүн 30 орнуудаас хоёрт нь зорчсон байх гэсэн шалгуур байдаг. OECD-ийн гишүүн орнууд гэдэгт Шенгений орнууд, Япон, БНСУ, АНУ, Канад, Австрали, Шинэ Зеланд зэрэг бусад улс орнуудад хөгжлийн тусламж үзүүлэх үүрэг хүлээсэн 30 орон багтсан байдаг ажээ. Эдгээр орнуудаас сүүлийн хоёр жилд хоёр улсад заавал зорчсон байх гэсэн заалтад хөнгөлөлт үзүүлж, дээрх 30 орны аль нэгд нь зорчсон байхаар шалгуурыг хөнгөвчилжээ. Ингэхдээ сүүлийн хоёр жилд гэсэн хугацаа заасан заалтыг ч авчээ. Ердөө л дээрх орнуудын аль нэгд нэг удаа зорчсон байхад та БНСУ руу зорчих олон удаагийн виз мэдүүлэх эрх үүсэх юм байна.

2. БНСУ руу зорчих олон удаагийн виз мэдүүлэгч сард хоёр сая төгрөгөөс багагү хэмжээний цалин бүхий  татвар төлөгч  байх ёстой гэсэн шалгуур бий. Тэгвэл виз мэдүүлэгч нь тогтвортой ажиллаж буй их дээд сургуулийн багш, профессор, эмч, өмгөөлөгч зэрэг мэргэжлийн хүмүүс байх аваас цалин нь хоёр сая төгрөг байхыг заавал шаардахгүйгээр хөнгөлөлт үзүүлжээ. Өөрөөр хэлбэл, нэр заасан мэргэжлийн хүмүүсийг санхүүгийн болзлоос чөлөөлж, цалин нь хоёр сая төгрөг хүрэхгүй ч виз мэдүүлэх эрхийг олгохоор болжээ.

3. Дараагийн хөнгөлөлт нь оюутнуудад хаягласан хөнгөлөлт юм. БНСУ-ын их дээд  сургуульд суралцагч оюутны гэр бүлийнхэн, аав ээж нь тодорхой хэмжээний санхүүгийн батлан даалт гаргадаг. Хэлний бэлтгэл, курст суралцаж буй бол 7000 ам.доллар, их дээд сургуулийн оюутан бол 15 000 ам.долларын батлан даалт гаргадаг. Тэгвэл БНСУ-д суралцагч оюутан БНСУ-ын тэргүүлэх 46 сургуульд суралцаж буй дээрх санхүүгийн батлан даалтаас чөлөөлөгдөх шийдвэрийг БНСУ-ын Элчин сайдын яамнаас гаргасан байна. Энэхүү хөнгөлөлт хоёрдугаар сарын 1-ний өдрөөс хүчин төгөлдөр үйлчилж эхлэх юм.

Түүнчлэн БНСУ руу сүүлийн хоёр жилийн дотор дөрвөн удаа зорчсон болон тус улсад хугацаа харгалзахгүйгээр нийтдээ тав болон түүнээс дээш удаа зорчсон иргэдэд  олон удаагийн виз мэдүүлэх эрх нээгджээ. Аялал, амралт, эмчилгээ үйлчилгээ, бизнес эрхлэх зэрэг олон шалтгаанаар БНСУ руу монгол хүмүүс зорчдог. Тэдгээр иргэд Монголдоо ирээд дахин визэнд орохын тулд 90 хоног хүлээдэг. Тэгвэл энэ сарын эхнээс эхлэн заавал 90 хоног хүлээлгүйгээр визэнд орох боломж нээгдсэн байна. Ингэхдээ тус улсад 60 хоногоос дээш хугацаагаар зорчсон бол чухам ямар шалтгаанаар тийн удсан болохоо албан ёсоор баталгаажуулах учиртай ажээ. Тус улсад 60 хоногоос дээш хугацаагаар зорчсон иргэд эмнэлэгт хүн сахисан, хүүхэд асарсан, шүүх хурал хүлээсэн, даатгалын мөнгө хүлээсэн гэх мэт олон шалтаг шалтгаан хэлдэг боловч түүнийг нь  Солонгосын талаас албан ёсоор баталгаажуулсан баримт бичиг авчирдаггүй гэнэ. Хэрвээ тэнд удсан шалтгаанаа албан ёсоор баталгаажуулах аваас та заавал 90 хоног хүлээлгүй дараагийн визээ мэдүүлж болох юм байна.

Визний нөхцөлд орсон хөнгөлөлтийн талаар илүү дэлгэрэнгүй мэдээлэл авахыг хүсвэл БНСУ-ын виз мэдүүлгийг төлөөлөн хүлээн авах төвүүдэд хандана уу.

Д.ЦЭЭНЭ