Солонгосын визний барьцааг болиулах санал тавилаа
2014.06.27 15:14
ГХЯ-ны консулын газрын захирал Ш.Сүхбаатартай уулзаж зарим асуудлаар тодруулга авлаа.
ГХЯ-ны консулын газрын захирал Ш.Сүхбаатартай уулзаж зарим асуудлаар тодруулга авла
-Монгол Улс, БНСУ-ын ГХЯ-дын консулын ээлжит зөвлөлдөх уулзалтыг саяхан хийсэн. Манай талаас ямар асуудалд анхаарлаа хандуулан, Солонгосын талтай хамтран ажиллахаар болов?
-Монгол иргэдэд Солонгосын тал виз олгоход шаарддаг банкны барьцааны мөнгийг бүрмөсөн болиулах, хэрэв шууд болиулах боломжгүй бол энхний ээлжинд 50 хувь бууруулж, үе шаттай арга хэмжээ авах,мөн монгол иргэдээс бүрдүүлдэг визийн материалын тоог цөөрүүлэх, виз олголтын хугацааг богиносгох асуудлыг Солонгосын талд манай талаас тавьсан.
Тэд эдгээр асуудлы анхаарч үзэхээ илэрхийлсэн. Бодитой ахиц гарна гэж найдаж байгаа. Уг асуудлуудыг шийдвэрлэхэд энэ оны эхээр УИХ-ын дарга З.Энхболд БНСУ-д айлчилсан нь том түлхэц боллоо.
- Консулын зөвлөлдөх уулзалтаар Солонгосын талаас ямар асуудал тавьсан бэ?
-Монгол Улсад оршин суугаа Солонгосын иргэд Монгол Улсад хамрагдаж буй нийгмийн даатгалын хугацааг уртасгах, хөрөнгө оруулагчдад урт хугацааны виз олгох, Монгол дахь Солонгос иргэдийн аюулгүй байдлыг хангах, Солонгос иргэдийн зарим асуудалд хүмүүнлэгийн үүднээс хандах асуудлыг солонгосын тал тавьсан.
Солонгосын талын тавьсан нийгмийн даатгал, хөрөнгө оруулагчдад урт хугацааны виз олгох зэрэг асуудлыг манай дотоодын байгууллагууд шийдвэрлэх боломжтой болохыг тайлбарласан.
-БНСУ-д хөдөлмөрийн гэрээгээр ажиллахаар яваа манай иргэдийг тус улсын хил дээрээс буцаадаг. Энэ асуудлыг шийдвэрлэх талаар ярьсан зүйл бий юү?
-Ажиллах хүчээр БНСУ-д зорчиж буй монгол иргэдийг БНСУ-ын хил дээрээс буцаадаг, эдийн засаг, сэтгэлзүйгээр хохирол амсдаг асуудлыг болиулах асуудлыг айлын талд тавихад, энэ асуудлыг холбогдох яамдтайгаа хамтран зогсоох арга хэмжээ авахаа илэрхийлсэн.
-БНСУ-д ажиллаж, амьдарч байсан манай зарим иргэд сураггүй болж, олон жил ар гэртэйгээ холбоо бариагүй тохиолдол бий. Энэ талаар айлын талтай хэрхэн хамтран ажиллаж байна вэ?
-БНСУ-д сураггүй болсон 19 иргэний ДНК-ийн харьцуулсан шинжилгээний хариуг Солонгосын талд өнгөрсөн жил өгөөд эрэн сурвалжуулж байна. Солонгост сураггүй болсон манай иргэдийг үр дүнтэй арга замаар цаашид эрэн сурвалжлах асуудлаар хоёр талын цагдаагийн байгууллага илүү ойр дөт хамтран ажиллахаар болсон.
Мөн Монгол, Солонгосын хооронд ялтан шилжүүлэх үйл ажиллагаа хэвийн явагдаж байгаа бөгөөд цаашид ч үр дүнтэй хамтран ажиллахаар тохиролцлоо.
-Урьд нь Сөүл дэх Монгол Улсын Өргөмжит консул Солонгос иргэдэд виз олгодог байсныг өөрчилж өнгөрсөн жилээс ЭСЯ визээ өөрөө олгох болсон гэж сонссон. Энд ямар нэг зарчмын ялгаа байна уу?
-Урьд нь Монгол Улсаас Сөүл хотод суугаа Өргөмжит консул компани байгуулан Монгол Улсын визийг олгодог байсан. Үүнийг 2013 онд болиулж Сөүл дэх Монгол Улсын ЭСЯ визээ өөрсдөө олгодог болсноор улсын төсөвт багагүй хэмжээний нэмэлт орлого төвлөрч байгаа.
Эдийн засгийн энэ мэт үр ашгаас гадна ерөөс манай улс маш идэвхитэй харилцаатай, иргэд харилцан ихээр зорчдог улсдаа элчин сайдын яамаараа дамжуулж өөрсдөө визээ олгодог болохын ач холбогдол их л дээ.
-Өмнө нь Элчин сайдын яамтай мөртлөө Солонгосын компани манай улсын визийг олгодог байсан хэрэг үү?
-Тийм гэж ойлгож болно. Компаниар дамжихын бас нэг сул тал нь визийн үйл ажиллагаа хэт мөнгөний төлөө болчихдог юм юм билээ. Өмнө нь өргөмжит консулаар дамжин олгогдож байхад онгоцны буудал дээр дуудлагаар ирээд тодорхой нэмэлт төлбөр аваад л шууд Монголын виза дарж өгч байсан гэдэг.
-Эдийн засгийг эрчимжүүлэх ажлын хүрээнд ГХЯ-ны зүгээс ямар ажлыг зохион байгуулж байна вэ? Монгол Улсад аялал жуулчлал, бизнесийн зорилгоор зорчих гадаадын иргэдийг визгүй зорчуулах асуудал хэрхэн шийдэгдэж байгаа вэ?
- Дотоодын нийт бүтээгдэхүүний нэг хүнд ногдох хэмжээ өндөр, хүний хөгжлийн индексээр тэргүүлэгч, санхүүгийн бололцоотой, Монгол Улсад хууль бусаар оршин суудаггүй, алслагдмал бүс нутгийн 42 улсын иргэдийг Монгол Улсад визгүй зорчуулахаар Засгийн газраас шийдвэр гаргалаа. Бид хэрэгжүүлэх ажлыг зохион байгуулж эхлээд байна. Иймэрхүү томоохон шийдвэрийг манай талаас санаачлан гаргаснаар манай иргэд эдгээр улсууд руу зорчих нөхцлийг хөнгөвчлөхөд ч чухал хөшүүрэг болох юм.
-ОХУ-тай хоёр орны иргэд харилцан визгүй зорчих асуудал хэрхэн шийдэгдэж байгаа вэ?
-Хоёр улсын Ерөнхийлөгчийн уулзалтын үеэр нилээд удаан яригдаж байгаа энэ асуудалд дорвитой ахиц гарсан, удахгүй шийдэгдэх болов уу гэж найдаж байна. ОХУ-аас удахгүй ажлын хэсэг ирнэ.