Солонгос Солонгос улс 2015 оны турш гадаадын хууль бус иргэдийн дунд эрчимжүүлсэн шалгалтыг хийнэ
2015.02.05 18:34
Солонгос улсын Ерөнхий сайд Жонг Хунг Вон өнөөдөр хуралдсан Үндэсний аюулгүй байдлын хорооны хуралд оролцлоо.
Тэрээр сүүлийн үед тус улсад оршин суух гадаадын иргэдийн , Солонгос улсын иргэдийн эсрэг үйлдэх хүнд, ноцтой гэмт хэргийн тоо өсч байгаатай холбогдуулан Солонгос улсын иргэдийн аюулгүй байдал, амар тайван амьдрах нөхцлийг хангахын тулд, хууль бус гадаадын иргэдийн дунд хийгдэх хяналт шалгалтыг эрчимжүүлж, тэднийг эх оронд нь албадан буцаах үүрэг даалгаврыг зохих албан тушаалтнуудад өглөө.
Солонгос улсад 2011 онд гадаадын иргэдийн үйлдсэн хүнд , ноцтой 696 удаагийн гэмт хэрэг бүртгэгдэж байсан бол энэ тоо 2012 онд 712, 2013 онд 837 болж жил бүр өссөн үзүүлэлттэй байна. Үүний адилаар тус улсад амьдран суух хууль бус гадаадын иргэдийн тоо сүүлийн жилүүдэд өссөөр эдүгээ 200 мянга давж байгаа бөгөөд эдгээрт хяналт, шалгалт хийж байх цагдаагийн байгууллагын нэг ажилтанд ноогдох гадаадын хууль бус иргэдийн тоо өссөн байна.
Тиймээс 2015 онд хууль бус гадаадын иргэдэд хийх бичиг баримтны шалгалтыг өмнөх жилээс ч илүү эрчимжүүлж, иргэд нь хамгийн их хараар үлддэг орны иргэдэд олгох бүх төрлийн визийг олгохдоо маш нарийн судалгаа хийж байх үүрэг даалгавар өгчээ. Мөн тус улсад визагүй зорчдог орнуудаас ирэх гадаадын иргэдэд хийх хяналтыг ихэсгэж, хараар үлдэх магадлал ихтэй гэж тооцсон иргэдийг хил нэвтрүүлэхгүй байхаар боллоо.
Тиймээс гадаадын хууль бус ажилчдын дунд хийх эрчимжүүлсэн шалгалтыг 2015 оны турш хийнэ гэж ойлгож болох үүрэг даалгаврыг Солонгос улсын Ерөнхий сайд Жонг Хунг Вон өнөөдөр өгсөн байна.
WWW.MGLRADIO.COM
Солонгос мэдээ булан.