Севолын эзний охиныг баривчиллаа
2014.05.30 14:14
Ёо Бюн Юн
Сар гаруйн өмнө далайд живж, олон зуун хүний амь насанд хүрсэн Севол онгоцны эзэмшигч Ёо Бюн Юны охин Ёо Сом Наг баривчилжээ. Тэрээр Парист амьдардаг бөгөөд олон улсын баривчлах зөвшөөрлийн дагуу түүнийг саатуулж, одоо БНСУ-ын талд шилжүүлэхээр хуулийнхан ажиллаж байгаа аж.
Севол онгоцыг эзэмшдэг Ёо Бюн Юныг татвараас зайлсхийсэн, хууль бус аргаар мөнгө олсон, мөн онгоц живсний дараа үүрэг хариуцлагаа үл ухамсарласан гэдэг үндэслэлээр шалгах шаардлагатай байгаа ч цагдаагийнхан одоо хүртэл түүнийг олохгүй байгаа юм. Түүнийг өөрийн байгуулсан шашны сүмдээ нуугдаж байгаа хэмээн сэжиглэж цагдаагийнхан гэнэтийн шалгалт хийсэн ч олоогүй. Маш баян чинээлэг амьдралтай ч олны өмнө барагтай харагдаж байгаагүй нууцлаг амьдралтай, гагцхүү тулааны урлагийн мэргэжилтэн, байгалийн гэрэл зураг авдаг гэдгээр нь олон нийт мэддэг Ёо Бюн Юны гэр бүл Севол онгоц живсэн гол бурууг үүрэх ёстой хэмээн БНСУ-ын Ерөнхийлөгч Пак Кын Хе мэдэгдсэн. Гэвч Ёо Бюн Юн болон түүний том хүү хуулийнхнаас зугтаж нуугдсаар байгаа юм. Цагдаагийнхан түүний хүүгийн тухай мэдээлэл өгсөн хүнд 100 мянган ам.доллар, харин хэргийн эзэн Ёо Бюн Юны тухай мэдээлэлд 500 мянган ам.доллар өгнө хэмээн амлаад байна.
476 зорчигчтой явснаас 174 нь аврагдаж, бусад нь амь үрэгдсэн Севол онгоцны ослын шалтгаан ачаа тээшээ хэтрүүлснээс болсон хэмээн мэргэжлийнхэн тайлбарлаж байгаа юм.
