Олон нийтийн саналаар Бан Ги Мүн тэргүүлээд байна
2016.12.28 19:56
Өмнөд Солонгосын иргэдийн дунд ирэх онд болох Ерөнхийлөгчийн сонгуульд нэр дэвших хүмүүсийн талаар санал асуулга явуулжээ.
Тус судалгаагаар НҮБ-ын Ерөнхий нарийн бичгийн дарга Бан Ги Мүн сөрөг хүчний тэргүүн Мун Жэ Иныг саналаараа тэргүүлээд байна. Ийм дүгнэлтийг “RealMeter” агентлаг гаргав.
Дээрх байгууллагаас явуулсан санал асуулгаар саналд оролцогчдын 23.3 хувь нь одоогийн НҮБ-ын Ерөнхий нарийн бичгийн дарга Бан Ги Мүнд өгчээ.
Удахгүй ажлаа хүлээлгэн өгөх тэрээр өнгөрсөн долоо хоногт Нью-Йорк хотноо мэдэгдэл хийхдээ сурсан мэдсэнээ улс орныхоо хөгжилд зориулахад бэлэн байгаагаа онцолж байв.Уг мэдэгдлийн дараа түүний чансаа ийн өссөнийг хэвлэл мэдээллийнхэн цохон дурджээ.
Бан Ги Мүний бүрэн эрхийн хугацаа энэ сарын 31-нд дуусах юм. Тэрээр ирэх нэгдүгээр сарын дундуур гэхэд нутаг буцсан байх аж.
НҮБ-ын 1946 оны нэгдүгээр сарын 24-нд баталсан 11/1 дугаар тогтоолоор тус байгууллагын Ерөнхий нарийн бичгийн дарга бүрэн эрхийн хугацаа дуусгавар болсны дараа төрийн албыг түр хугацаагаар хашихаас түдгэлзэхийг онцолсон байдаг аж.
“RealMeter” агентлагийн явуулсан дээрх социологийн судалгаагаар Өмнөд Солонгосын Ерөнхийлөгчид нэр дэвших магадлалтай хүмүүсийн жагсаалтад хоёрдугаарт тус улсын сөрөг хүчний тэргүүн Мун Жэ Ин бичигдээд байна. Тэрээр саналд оролцогчдын 23.1 хувийн саналыг авчээ. Энэхүү үзүүлэлт нь өмнөх судалгаатай харьцуулахад 0.6 хувиар бага аж.
Гуравдугаарт, БНСУ-ын “Ардчилсан нам”-ын тэргүүн Ли Жэ Мён 12.3 хувийн саналаар ороод байна. Гэхдээ урьдах судалгаатай нь харьцуулахад мөн 2.6 хувиар буурчээ.
Дөрөв дэх нэр дэвшигчээр Ан Чхоль Суг нэрлээд байна. Программист мэргэжилтэй тэрбээр бизнес эрхлэгч аж. Түүнийг саналд оролцогчдын 8.2 хувь нь дэмжжээ.
Өмнөд Солонгост Ерөнхийлөгчийн сонгууль товлосон хугацаанаас наан болох магадлал өндөр байгаа аж. Учир нь Ерөнхийлөгч Пак Гын Хэгийн дотны найз Чой Сун Силь авлигын хэрэгт холбогдсоны дараа түүнийг огцруулах тухай асуудал хөндөгдсөн.
Өнгөрсөн арванхоёрдугаар сарын 9-нд тус улсын парламентын гишүүдийн дунд түүнд итгэл үзүүлэх эсэх талаар санал асуулга явуулсан юм.
Санал хураалтын дүнгээр гишүүдийн дийлэнх нь Пак Гын Хэг огцруулахыг дэмжсэн. Үүний дараа түүний бүрэн эрхийг түр түдгэлзүүлж, асуудлыг эцэслэн шийдвэрлүүлэхээр Үндсэн хуулийн цэцэд өргөн барьсан билээ.
Тиймээс ирэх зун гэхэд уг асуудал бүрэн шийдэгдсэн байх ёстой аж.
Эх сурвалж: Риа Новости