"Инчеон - 2014" Азийн 17-р наадам  2014 оны 09 дүгээр сарын 19-нөөс 10 дугаар сарын сарын 04-ний өдрүүдэд БНСУ-ын Инчеон хотод зохион байгуулагдах юм. Энэхүү наадмын зохион байгуулах хорооны ерөнхийлөгч ноён Ким Ён Сү тэргүүтэй төлөөлөгчдийг  Соёл, спорт, аялал жуулчлалын сайд хатагтай Ц.Оюунгэрэл  хүлээн авч уулзлаа. Тэд МҮОХ-ны урилгаар манай улсад ирээд байгаа юм байна. Манай улс уг наадамд олон тамирчин оролцуулахыг зориж байгаа бөгөөд оролцох тамирчдын 40 хувь нь эмэгтэй тамрчид байгааг Ц.Оюунгэрэл сайд уламжлаад манай тамирчдын буудаллах байранд хөнгөлөлт үзүүлэх, уг наадмыг үзэхээр очиж буй спорт сонирхогчдод болон тамирчдын ар гэрийнхэнд визийн хөнгөлөлт үзүүлж, виз гаргаж өгөх асуудалд анхаарах, буурай хөгжилтэй орнуудтай нэг дор байрлавал бид туршлагаасаа хуваалцах зэрэг боломжууд байгааг дурдаад дээр хөндсөн асуудалд анхаарч өгөхийг хүссэн юм. Үүний хариуд ноён Ким Ён Сү Ц.Оюунгэрэл сайдыг "Инчеон - 2014" Азийн 17-р наадмын нээлтэд оролцохыг өөрийн биеэр урихын ялдамд уг асуудалд анхаарч дэмжлэг үзүүлэх болно хэмээлээ. Мөн уг наадам ялахын төлөө улайрсан бус найрамдал, эрх тэгш байдлыг дэмжсэн наадам байхаар зохион байгуулах зориж байгаа ба дэд хөтөлбөрүүд хэрэгжүүлж байгаа гэлээ.