Сөүл хотод шинээр баригдсан барилгуудын гадна хананд агааржуулагч гадагшлуулах төхөөрөмж суурилуулахгүй
2018.10.11 13:00
Сөүл хотын захиргаанаас бүх шинээр баригдаж буй барилгуудын дотор хэсэг болон дээвэр дээр агааржуулагч гадагшлуулах төхөөрөмжийг байршуулахыг зааварчлан “Агааржуулагч гадагшлуулах төхөөрөмжийг суурилуулах аргыг боловсронгуй болгох төлөвлөгөө”-г ирэх оны 1 сарын 1-ээс хэрэгжүүлэх болсон талаараа 8-ны өдөр мэдээлсэн байна.
Барилгын гадна хананд суурилж байсан төхөөрөмж нь хотын өнгө үзэмжийг таагүй харагдуулахаас гадна төхөөрөмжөөс гарах халуун агаар, чимээ шуугиан зэрэг нь иргэдэд тав тухгүй байдлыг үүсгэдэг байжээ. Мөн төхөөрөмж нь наранд хэт халах юм уу тоос их бөөгнөрөх үед гал гарах аюултайгаас гадна доошоо унах зэрэг осол гарах магадлал өндөр байдаг аж.
Нийтийн орон сууцнуудын хувьд “Орон сууцны байгууламжийн стандартын тухай дүрэм журмын” дагуу агааржуулагч гадагшлуулах төхөөрөмжийг барилгын дотор хэсэгт суурилуулсан байна. Дээрх төлөвлөгөөтэй холбогдуулан төхөөрөмжийг барилгын дээвэр дээр байрлуулах тохиолдолд эсрэг талын замаас харагдахгүй байрлалд суурилуулах юм байна.
Сөүл хотын орон сууц барилга байгууламжийн хэлтсийн дарга Рюу Хүн нь “Төлөвлөгөө хэрэгжвэл тус төхөөрөмжөөс үүссэн тав тахгүй байдал, хотын үзэмж муудах, доош унах зэрэг олон асуудлыг шийдэх боломжтой хэмээн” хүлээж байгаа бөгөөд үүгээр зогсохгүй тус төхөөрөмжийг наранд ил тавихгүй байснаар агааржуулагчийн хүйтнээр үлээх байдал сайжрахын хамт эрчим хүч хэмнэх үр дүнтэй хэмээн онцлон ярилаа
