Өмнөд Солонгосын ерөнхийлөгчийг улс төрийн тавцангаас зайлуулахын төлөө тэмцэгчид 2016 оны сүүлийн өдрийг жагсаж тэмдэглэв.

Өчигдөр Сөүл хотноо жагссан иргэд 2017 онд тус улсын улс төр, нийгмийн амьдралд ил тод байдал авчрахыг уриалжээ.

Аравдугаар сарын 29-нд эхэлж долоо хоног бүрийн Бямба гарагт зохиогдож байсан эсэргүүцлийн жагсаалын 10 дахь нь өчигдөр болсон юм. 10 дахь жагсаалд орон даяар 900,000 хүн оролцсон нь 10 жагсаалын нийлбэр дүнгээр 10 сая хүн оролцсон амжилтыг үзүүлснийг зохион байгуулагчид мэдээлжээ.

10 дахь удаагийн эсэргүүцлийн жагсаал өчигдөр орой 18:00 цагт эхэлж, залгаад шинэ оноо угтсан байна.

Шинэ жилээ тэмдэглэхээс өмнө жагсагчид ерөнхийлөгчийн ордон, үндсэн хуулийн шүүх, ерөнхий сайдын ордон гэсэн байгууламжуудыг чиглэн жагссан гэнэ.

Өмнөд Солонгосын ерөнхийлөгч Пак Гын Хэг тус улсын парламент албан тушаалаас нь түдгэлзүүлээд байгаа бөгөөд одоо Үндсэн хуулийн шүүх энэхүү шийдвэрийг нягтлан шалгаж байгаа. Хэрвээ үндэслэлтэй гэж үзвэл Пак Гын Хэ даруй албан тушаалаасаа огцорч, ерөнхийлөгчийн ээлжит бус сонгуулийг зарлана. Харин үндэслэлгүй гэж үзвэл Пак Гын Хэ буцан ерөнхийлөгчийн албан тушаалдаа суух юм.

Тиймээс эсэргүүцэгчид Үндсэн хуулийн шийдвэрийг ерөнхийлөгчийн эсрэг гарах хүртэл тэмцлээ үргэлжлүүлэхээ мэдэгдээд байгаа ажээ.

Эх сурвалж: Korea Times