Хоёр Солонгосын харилцааг сайжруулах хийгээд ХОЙД Солонгос болон АНУ хоорондын яриа хэлэлцээг бэхжүүлэх зорилгоор Өмнөд Солонгосын Ерөнхийлөгч Мүн Жэ Ин 2 тусгай элчээ Умард Солонгос руу илгээнэ хэмээн Өмнөд Солонгосын төрийн тэргүүний туслах мэдэгдсэн тухай “Ёнхап” агентлаг мэдээлэв.
Түүний мэдээлснээр, Өмнөд Солонгосын ерөнхийлөгчийн дэргэдэх Үндэсний аюулгүй байдлын газрын дарга Чон Ый Ён болон Үндэсний тагнуулын албаны захирал Со Хун нар Умард Солонгост 2 өдрийн айлчлал хийх аж. Түүнчлэн Өмнөд Солонгосын төлөөлөгчдийн бүрэлдэхүүнд Улс орноо нэгтгэх яамны орлогч сайд Чун Хэ Сун, ерөнхийлөгчийн тамгын газрын албан тушаалтан Юн Кун Ян болон Үндэсний тагнуулын албаны өндөр албан тушаалтан Ким Сан Гюн нар багтжээ.
Айлчлалын үеэр Өмнөд Солонгосын төлөөлөгчид тус улсын Ерөнхийлөгч Мүн Жэ Ины захидлыг Умард Солонгосын удирдагчид дамжуулж, хоёр Солонгосын төрийн тэргүүн нарын уулзалт хийх тухай Ким Жөн Уны саналыг хэлэлцэх төлөвтэй байна.
Ёнхап агентлагийн мэдээлснээр, Өмнөд Солонгосын тусгай элчүүд Умард Солонгост айлчилсны дараа айлчлалынхаа үр дүнг хэлэлцэхээр АНУ-д богино хугацааны айлчлал хийх аж.
Өнгөрсөн пүрэв гарагт БНСУ-ын Ерөнхийлөгч Мүн Жэ Ин АНУ-ын төрийн тэргүүн Дональд Трамптай утсаар ярихдаа Умард Солонгост тусгай элчээ илгээх бодолтой байгаагаа мэдэгдсэн билээ. “Яриа хэлэлцээний үндсэн асуудлууд нь Умард Солонгосыг пуужингийн болон цөмийн хөтөлбөөрөөс нь татгалзуулах явдал юм хэмээн” талууд батлан хэлсэн юм.
Э.Аянзаяа
