СӨҮЛ. /Reuters/. THAAD буюу баллистик пуужинг замаас нь амдан устгах дэвшилтэт технологийн системийг Өмнөд Солонгост байрлуулсныг тус улсын ард иргэд эсэргүүцэн нийслэл Сөүл хотод томоохон жагсаал хийлээ.

Өмнөд Солонгосын хэдэн мянган иргэн өчигдөр Сөүл хотын төвд THAAD-ыг эсэргүүцэн жагссан байна.

Умард Солонгосын баллистик пуужингаас улс орноо хамгаалах зорилгоор THAAD-ыг байрлуулахыг Пак Гын Хэгийн засаг захиргааны үед Өмнөд Солонгосын тал АНУ-ын хүчнийхэнд зөвшөөрсөн билээ. Тус системийг байрлуулсныг өмнөд солонгосчууд эрс эсэргүүцэж байна.

Энэ систесмийг хууль бусаар байрлуулсан гэж өчигдрийн жагсаалд оролцогчид үзэж байна. Тэд хэлэхдээ “энэ систем Өмнөд Солонгосыг хамгаалж чадахгүй” гэв.

Эсэргүүцлээ илэрхийлэгчид Сөүл хот дахь АНУ-ын ЭСЯ-ны байрыг тойрон жагсаж, “THAAD-ыг буцааж тат!” гэж уриа хашгирч байв.

Нөхцөл байдал түгшүүртэй байсан ч цагдаа, цэргийнхэн аюулгүй байдлыг сайтар чангатгасан байсан учир эмх замбараагүй байдал үүсээгүй байна.

THAAD-ыг байрлуулсныг өнгөрсөн сард ажлаа авсан Өмнөд Солонгосын Ерөнхийлөгч Мүн Жэ Ин мөн эсэргүүцэж байгаа юм. Энэ системийн байгаль орчны нөлөөллийн үнэлгээг хийхийг тэрбээр холбогдох албаны хүмүүст үүрэг болгоод байгаа билээ.

Мүн Жэ Ин энэ сарын сүүлчээр АНУ-д айлчилж, тус улсын Ерөнхийлөгч Дональд Трамптай анхны нүүр тулсан уулзалтаа хийх юм.