Солонгос Ерөнхийлөгчид таалагддаггүй урлагийнхныг хар жагсаалтад оруулж байсан Өмнөд Солонгосын сайдыг баривчилжээ
2017.01.25 17:05
Өмнөд Солонгосын ерөнхийлөгч Пак Гын Хэд шүүмжлэлтэй ханддаг 10,000 орчим урлагийн хүний нэрийг хар жагсаалтад хадгалж байсан гэх соёлын сайдыг өчигдөр буюу Бямба гарагт албан тушаалаас нь огцруулан баривчилжээ.
Чо Юүн Сун сайд ийм жагсаалтад оруулсан уран бүтээлчдийг засгийн газрын дэмжлэгээс хасах, хөрөнгө оруулалтын гадуур орхих, үйл ажиллагааг нь хянаж, тагнадаг байсан гэнэ.
Чо сайдыг эрх мэдлээ хэтрүүлэн ашигласан, итгэл эвдсэн гэсэн шалтгаанаар баривчлах шийдвэр гаргаснаа Сөүлийн Төв дүүргийн шүүхээс мэдээлжээ.
Одоо 50 настай Чо Юүн Сун сайдыг “Пакын үнсгэлжин” хэмээн хочилдог ба ерөнхийлөгчид үнэнчээрээ алдартай нэгэн юм. Тэр өмнө нь мөн хүйсийн тэгш эрхийн асуудал хариуцсан сайдын албыг хашиж байжээ.
Шүүхээс мөн Пак ерөнхийлөгчийн тамгын газарт өндөр албан тушаал хашиж байсан Ким Ки Чуныг баривчлах шийдвэр гаргасан байна. Түүнийг ийм хар жагсаалт гаргахыг Чо сайдад даалгаж байсан гэж буруутгажээ.
78 настай Ким өмнө нь тагнуулын чухал алба хашиж байсан ба Пак ерөнхийлөгчийн аавын үед хүний эрхийг зөрчсөн үйл явдлуудад холбогдож байсан гэгддэг юм.
Ерөнхийлөгч Пак Гын Хэ, түүний дотны найз Чой Сүүн Сил нарыг тойрсон албан тушаал, авлигын хэрэгт холбогдуулан олон хүнийг шалгаж байгаагийн сүүлийнх нь Чо, Ким нар болж байна.
Урлагийнхны хар жагсаалтад Өмнөд Солонгосын кино, театр, хөгжим, дүрслэх урлаг, уран зохиолын олон уран бүтээлчид багтсан байгаа ажээ.
Тухайлбал, 2016 оны Man Booker олон улсын шагналын эзэн, зохиолч Хан Кан, 2004 оны Канны Кино наадмын гранпри шагналт, кино найруулагч Пак Чан Вук нар тэдний дотор багтсан байна.
Үүнээс өмнө Самсунгийн дэд ерөнхийлөгч Ли Жэ Ёныг прокурор баривчлах хүсэлт гаргасан ч шүүхээс хангалттай үндэслэлгүй хэмээн үзээд зөвшөөрөөгүй юм.
Түүнийг Чой Сүүн Силийн хувийн санд их хэмжээний авлига өгч, хариуд нь бизнестээ ашигтай шийдвэр гаргуулсанд буруутгаж байгаа ажээ.
Эх сурвалж: AFP
