“Galaxy Note 7”Шинэчлэн сайжруулсан -г дэлхийн зах зээлд гаргана
2017.03.28 20:30
Эрх бүхий байгууллагаас галын аюултай гэсэн дүгнэлт гарсны дараа зах зээлээс татаж аваад байсан “Galaxy Note 7” ухаалаг гар утсыг шинэчлэн сайжруулж зах зээлд гаргана гэж “Samsung” компанийн удирдлага даваа гарагт мэдэгдлээ.
"Note 7"-г өнгөрсөн оны 8 дугаар сард хэрэглэгчдэд танилцуулаад удаагүй байх үед уг гар утас шатах эрсдэлтэй гэдэг нь тодорхой болсон бөгөөд энэ нь утасны зай хураагуурыг үйлдвэрлэхэд асуудал үүссэнтэй холбоотой болохыг тогтоосон билээ. Зах зээлд гаргаснаас ердөө хоёрхон сарын дараа ийм загварын бүх гар утсыг дэлхийн зах зээлээс эргүүлэн татсан бөгөөд эдгээр гар утаснуудыг бүгдийг нь устгана, засч сайжруулан худалдахгүй гэж "Samsung" мэдэгдэж байсан юм.
Гэтэл одоо тус компани шинэчлэн сайжруулсан “Note 7”-г зах зээлд гаргахаар засгийн газрын эрх бүхий байгууллагуудын зөвшөөрлийг хүлээж байгаа бололтой.
“Samsung” компани мэдэгдэлдээ “Шинэчлэн сайжруулсан “Galaxy Note 7”-ын тухайд гэвэл хэрэглээнд гарах эсэх нь эрх бүхий байгууллагууд болон борлуулагчидтай зөвлөлдөн орон нутгийн хэрэгцээг харгалзан үзсэний дараа тодорхой болно. Аль зах зээлд гаргах болон хэзээ гаргах вэ гэдгийг тухайн үед нь тогтооно” гэж дурдсан байна.
Энэ бол уг утсыг дахин эргэлтэнд оруулах ерөнхий стратегийн нэгээхэн хэсэг хэмээн “Samsung” мэдэгджээ. Эргүүлэн татаж авсан гар утасны дахин ашиглаж болох эд ангиудыг салган авах, байгаль орчинд ээлтэй аргаар утаснаас зэс, никель, алт, мөнгө зэрэг үнэт металлыг ялган авахаар төлөвлөж байгаа аж.
Тус компани өөрийн хамгийн шинэ, шилдэг бүтээгдэхүүн болох "Galaxy S8" ухаалаг гар утсаа Нью-Йорк хотод болох арга хэмжээний үеэр танилцуулахаас хоёр хоногийн өмнө дээрх мэдэгдлийг хийлээ.
“Galaxy S8” нь “Note 7” –г гаргасны дараа тус компанийн танилцуулах гэж буй анхны утас бөгөөд хэрэглэгчдийн итгэлийг эргүүлэн олж авахын тулд хэрэглэгчдэд хандсан сурталчилгааны ажилдаа тус компани шамдан ороод байгаа юм.
"Note-7"-гийн “сүйрэл” Samsung компанид ойролцоогоор 5.5 тэрбум долларын алдагдал учруулсан ажээ.
Х.Сарнай