Монголын шатрын холбооны ерөнхийлөгч Ц.Сайнбаяр И.Отгонбатыг Монголын шатрын холбооны Өмнөд Солонгос дахь төлөөлөгчөөр томиллоо.

Өмнөд Солонгос улсад төлөөлөгчтэй болсноор Ази болон Солонгос улсад явагдах тэмцээнд оролцох манай шатарчдад дэмжлэг үзүүлэх, зарим асуудлыг шийдвэрлэхэд туслах, Өмнөд Солонгос улсад сурч ажиллаж байгаа ард иргэдийн хүүхдүүдийг шатарт дур сонирхолтой болгоход чиглэсэн ажлыг хэрэгжүүлэхэд чухал алхам боллоо.

И.Отгонбат нь энэ оны наймдугаар сард Сувон хотноо явагдсан Ази тивийн аварга шалгаруулах өсвөрийн шатарчдын тэмцээний зохион байгуулах хорооны бүрэлдэхүүнд орж амжиллтай сайн ажилласан юм. Мөн Монгол улсаас БНСУ-д суугаа Элчин Сайдын нэрэмжит Тусгаар тогтнолын өдөр, Чингис хааны мэндэлсэн өдөрт зориулсан шатрын уламжлалт тэмцээн, Сөүл хот болон Инчон хотод суугаа Монголчуудын наадмын шатрын тэмцээнийг 2010 оноос хойш жил бүр хамтран зохион байгуулж байгаа.

Өмнөд Солонгосын шатрын холбооны "Кей лигийн" тэмцээнд Монгол оюутан болон ажилчин Монголчуудаас бүрдсэн "Скай Монгол" багийг 2013 онд үүсгэн байгуулж,  амжилттай оролцсоор байна.

И.Отгонбат Сөүлд Монгол сургуульд суралцаж байгаа хүүхдүүдэд шатар зааж сурган, тэмцээнд оролцуулж, Монголынхоо ирээдүйн шатарчдыг бэлтгэхэд үнэтэй хувь нэмэр оруулж байгаа авьяаслаг залуусын нэг юм.

Б.ЭНХ